ليه كل من لاتذكّر ذكرياته
يشعر إنها أحلى أيام بحياته
بس يتنهـّد وهو يحكي .. ويذكر
حلوها مع مرّها وشلون جاته
يتذكّر بعض الأشيا .. ويــتـبـسّم
من يصدّق إنها من ذكرياته ؟
هالمواقف بعضها كانت كـبـيـره
بعضها خـلاّه يـتـمـنّى ممـــاته!
وبعضها للحين لاتذكّرها يضحك
كـيـف ذاك الـشـي ذاك اليوم فاتـه
وبعضها للحين لاتذكرها يــســرح
ويــتـساءل وين راحت أمنياته ؟!
آه ياذا العمر .. ياسرعك عـلينا
وااجد اللي مايحـسـّون بـ فواته
وآه يالإنسان وشلون يتغيّـر
كل شيٍّ فيه .. حتى ( تضحياته ) ... !
يـتـغـيـّر غصب عنّه , بسّ يـبـقـى
طينه يأثر على طيبة نباته ..
وان بـغـيت تعرف اي انسان وش هو؟
طالعه لاقام يـسـرد ذكريـــــــــاته ..